《愛.改變生命》 見證分享：廖欣欣

欣：你好，我叫欣欣。我已經信左耶穌十年，短短係呢十年黎我既改變有人話係 奇蹟，而我就話係「神」蹟。

媽：你好，我係欣欣媽媽。我認識耶穌呢個名幾十年，但係我信耶穌都只係呢兩年幾時間。點解我信？係因為我個女影響我。

欣：我未信耶穌前覺得父母唔係好重視我同關心我，所以從細就形成我係一個好自卑、好消極、好反叛、內心好空虛、好無目標既女仔。青少年時期，我開始搵我自己既快樂，我開始無心向學，成日群埋一班壞朋友，覺得同佢地一齊無咁自卑同埋有認同感，所以就有樣學樣，學佢地逃學、講粗口、食煙、聊事鬥非等等。當然，我咁做家人實好擔心同傷心。

記得有一次，我同ｄ朋友係屋企樓下玩到半夜先番屋企，我媽媽好擔心我，佢就落街週圍咁搵我，搵到差唔多成十二點，終於俾佢係lift口撞到，佢好嬲咁問我去左邊，知唔知人擔心，我無理佢就返左屋企，然後我媽媽一返到入屋，立刻衝入房羅隻衫架出黎打我，我仲記得我個時企左係廁所門口，就企係到俾佢不停咁打，但我竟然半滴眼淚都無流出黎，打左一陣之後，我就一手捉住左佢隻衫架，用好冷漠既眼神望住我媽媽，心裡面用好多好難聽既說話鬧佢，然後我見到佢喊住咁講話點解你會變成咁，你點解會咁？但我依然無動於忠，繼續用好冷漠既眼神望住佢，最後佢好傷心咁入左房喊……

媽：我個時真係好傷心，好心痛，諗住呢個女都係無架啦，好想放棄佢，但又唔捨得，都唔知可以點教佢。

欣：我過去一直都過住ｄ好浪蕩既生活，而且同家人既關係都好差，直至93年我信左耶穌後，我認識咩係「愛」，因為耶穌既「愛」改變左我既性格同人生觀，又幫助我重新建立我同家人既關係。

媽：我個女信左耶穌之後，真係成個人唔同晒，佢唔再黑口黑面咁對住我地，又識得尊重同關心我地。早幾年佢仲辭左份工，全職做傳道既工作，收入低又多野做，但佢都肯繼續做落去，我個時都覺得佢唔似個ｄ未信既女仔鍾意貪威識食，覺得佢既信仰真係改變左佢。

所以自從佢改變左之後，又見證過神既幫助，最後就咁就相信左耶穌喇。

《愛.改變生命》 (影音版）

如想更多認識耶穌基督及信仰問題，可到www.21GN.net或留下個人聯絡方法，我們會有專人與你聯絡．（也可以與介紹你看此網頁的基督徒朋友了解有關耶穌基督的事跡）